नेपालललाई आकर्षक, रमणीय र सुरक्षित पर्यटकीय गन्तव्यका रुपमा विकास गर्ने सरकारी घोषणा
सरकारले नेपालललाई आकर्षक, रमणीय र सुरक्षित पर्यटकीय गन्तव्यका रुपमा विकास गर्ने घोषणा गरेको छ । पर्यटनलाई उच्च् प्राथमिकता दिएको सरकारको दाबीसँगै गत आइतबार सार्वजनिक भएको बजेटमा मुलुकको पर्यटन विकास तथा प्रवद्र्धनका लागि सरकारले ३ अर्ब ९२ करोड रुपैयाँ बजेट विनियोजन गरेको छ ।
व्यवस्थापिका संसदमा आगामी आर्थिक वर्षको बजेट सार्वजनिक गर्दै अर्थमन्त्री डा रामशरण महतले नेपाल वायुसेवा निगममा आगामी ५ वर्षभित्र आन्तरिक उडानतर्फ १५ वटा र अन्तर्राष्ट्रियतर्फ ७ वटा नयाँ जहाज सञ्चालनमा ल्याउने उल्लेख गरेका छन । त्यस्तै बजेटमा रारा ताल र अन्य महत्वपूर्ण तालका किनारमा रिसोर्ट निर्माण गर्ने पर्यटन व्यवसायीलाई १० वर्षसम्म आयकरमा छुट दिइने उल्लेख गरिएको छ । त्यस्तै, पोखराको फेवातालमा म्यूजिकल वाटर फाउन्टेन निर्माणका लागि निजी क्षेत्रलाई आकर्षित गरिने भएको छ ।
विराटनगर, नेपालगञ्ज र धनगढी विमानस्थलहरुलाई सुविधासम्पन्न क्षेत्रीय विमानस्थल बनाउने, जनकपुर, भद्रपुर र सुर्खेत विमानस्थललाई रात्रीकालीन अवतरणयोग्य बनाउने बताइएको छ । मुलुकभर विमानस्थल निर्माण, सुधार र अध्ययनका लागि सरकारले बजेटमा ७ अर्ब ८ करोड रुपैयाँ विनियोजन गरेको छ ।
बाराको निजगढमा दोस्रो अन्तर्राष्ट्रिय विमानस्थल निर्माण सुरु गर्न ५० करोड रुपैयाँ विनियोजन गरिएको छ । त्रिभुवन अन्तर्राष्ट्रिय विमानस्थललाई आधुनिकीकरण, भैरहवा र पोखरा विमानस्थलको स्तरोन्नतीका लागि काम अगाडी बढाइने भएको छ ।
बजेटमा ताप्लेजुङदेखि दार्चुलासम्मको उच्च पहाडी ग्रामीण पर्यटन मार्गलाई पर्यटन पूर्वाधार कार्यक्रम अन्तर्गत द ग्रेट हिमालयन ट्रेल अवधारणालाई प्राथमिकताका साथ अघि बढाइने बताइएको छ । लुम्बिनी र पशुपति क्षेत्रको गुरुयोजना कार्यान्वयनमा तिब्रता दिने, अन्य धार्मिक पर्यटकीय स्थलहरुको विकास गरेर धार्मीक पर्यटन विकास गर्ने पनि सरकारको लक्ष्य रहेको छ ।
खिलराज रेग्मी सरकारले पर्यटन प्रवद्र्धनमा जोड दिँदै मुलुकका पाँचवटै विकास क्षेत्रलाई समेट्ने गरी श्रीअन्तु, टिष्टुङ, ढोरपाटन, रानीमहल, रारा, खप्तड, रामारोशन र चिसापानी क्षेत्रमा पर्यटन पूर्वाधार विकासमा बजेट छुट्टाएको थियो ।
मुलुकका विभिन्न स्थानमा विमानस्थलको सम्भाव्यता अध्ययन, निर्माण, स्तरोन्नती र जग्गा अधिग्रहणका लागि १ अर्ब ८१ लाख विनियोजन गरेको थियो । त्यस्तै, टीकापुर, डोल्पा, रुकुम, इलाम, लामीडाँ र भोजपुर विामनस्थल निर्माण र स्तरोन्नतीमा जोड दिइएको थियो । रारा, सिमीकोट र लुक्ला विमानस्थललाई साधन सम्पन्न बनाउने, पाल्पामा पर्यटकीय विमान स्थल र उदयपुरमा त्रियुगा विमानस्थलको सम्भाव्यता अध्ययन गरिने बजेटमा कार्यक्रम राखिएको थियो । त्यस्तै बिमानस्थलमा यात्रुभवन, अन्तर्राष्ट्रिय विमानस्थलमा हवाई सुरक्षा अभिवृद्धि गर्न नयाँ राडार तथा अत्याधुनिक प्रणाली जडान गर्ने र यसको क्षमता विस्तार गर्ने, विराटनगर, जनकपुर, नेपागञ्ज र सुर्खेत विमानस्थललाई हव विमान स्थलको रुपमा स्तरोन्नती गर्ने पनि सरकारले बजेटमा उल्लेख गरेको थियो । पर्यटक पदमार्ग र हरियाली क्षेत्र विकासका लागि ६३ करोड बजेट छु्ट्टाइएको थियो । नाफामा सञ्चालित सबै सार्वजनिक संस्थान र ‘क’ र ‘ख’ वर्गका बैंक तथा वित्तीय संस्थामा कार्यरत कर्मचारीहरुलाई प्रत्येक वर्ष सात दिनका लागि नेपालभित्रका पर्यटकीय स्थलहरुमा संस्थाहरुको खर्चमा अनिवार्य भ्रमण गर्ने व्यवस्था गरिएको थियो ।
पुरातात्विक दृष्टिकोणले महत्वपूर्ण धार्मिक तथा सांस्कृतिक स्थलहरुको जिर्णोद्धार, संरक्षण र संवद्र्धनका लागि १३ करोड रुपैयाँ छुट्टाइएको थियो । त्यस्तै, सांस्कृतिक प्रतिष्ठान र संग्राहलयहरुको सुदृढिकरणका लागि ४३ करोड रुपैयाँ बजेटमा व्यवस्था गरिएको थियो ।
TOURISM TIMES 